በደቡብ ምዕራብ ኢትዮጵያ ህዝቦች ክልል የምትገኘውና በአብዛኛው ጥቅጥቅ ባሉ ደኖች የተሸፈነችው ሸካ ዞን፣ በውስጧ ያቀፈቻቸውን ታሪካዊና ተፈጥሯዊ የቱሪስት መዳረሻዎችን የመለየትና የማልማት ስራ መጀመሩን የዞኑ ባህል፣ ቱሪዝምና ስፖርት መምሪያ አስታወቀ።
የመምሪያው የቱሪዝም ፕሮሞሽንና ግብይት ቡድን መሪ አቶ ብርሃኑ አያሾ እንደገለጹት፣ በዞኑ ወረዳዎችና ከተሞች በጥናት ላይ የተመሰረተ የመስህብ ስፍራዎችን የመለየት ስራ ተከናውኗል። ይህ ጥረትም ዞኑ ከያዘው የተፈጥሮ ሀብት ተጠቃሚ እንዲሆንና ለጎብኚዎችም አዲስ አማራጭ እንዲሆን ያለመ ነው።
በተለይም በማሻ ወረዳ የሚገኙት ሚስጥራዊ የሆኑት የሸክሸኮ እና ጋሀማዎ ዋሻዎችና ፏፏቴዎች እንዲሁም በአንድራቻ ወረዳ የሚገኘው አስገራሚውን የጋንዲዎቺ የተራራ ላይ ሀይቅ ከተለዩት መስህቦች መካከል ተጠቃሽ ናቸው። እነዚህን የተፈጥሮ ድንቆች ለጎብኚዎች ምቹ በማድረግ ለአካባቢው ወጣቶች ዘላቂ የስራ ዕድል ለመፍጠር እየተሰራ መሆኑን አቶ ብርሃኑ አክለው ገልጸዋል።
እነዚህ የቱሪስት መዳረሻዎች ከተፈጥሮ ውበታቸው ባሻገር፣ ጥልቅ ታሪካዊ ፋይዳም አላቸው። በተለይም ዋሻዎቹ በተለያዩ የጦርነት ጊዜያት የአካባቢው ማህበረሰብ ራሱንና ንብረቱን ከጥቃት ለመከላከል እንደ ተፈጥሯዊ ምሽግ ይጠቀምባቸው እንደነበር ተገልጿል፤ ይህም ቦታዎቹን የታሪክና የጀግንነት ማህደር ያደርጋቸዋል።
የአካባቢው ነዋሪዎችም የዚህ ጥረት አካል ናቸው። ወጣት ሰውዓለም በቀለ እና አቶ አስታውሰኝ እንደሻው የተባሉ የማሻ ወረዳ ነዋሪዎች፣ “እነዚህ ስፍራዎች በአባቶቻችን ብርቱ ጥረት ተጠብቀው የቆዩ የአደራ ቅርሶች ናቸው፤ አሁን የመንከባከቡና ለትውልድ የማስተላለፉ ኃላፊነት የእኛ ነው” በማለት በኩራት እየተወጡት ያለውን ኃላፊነት ተናግረዋል።
በመጨረሻም አቶ ብርሃኑ አያሾ፣ የሸካ ዞን የቱሪስት መዳረሻዎች ምቹና ማራኪ በመሆናቸው በሀገር ውስጥና በውጭ የሚገኙ ጎብኚዎች ይህንን ያልተነካ የተፈጥሮ ውበትና ታሪክ እንዲመለከቱና እንዲያጣጥሙ ክፍት ጥሪ አቅርበዋል ሲል የደቡብ ምዕራብ ሚዲያ ኔትወርክ ዘግቧል።
