የዳውሮ ልማት ማህበር እንቅስቃሴ ከትላንት እስከ ዛሬ

የዳውሮ ዞን በደቡብ ምዕራብ ኢትዮጵያ ህዝቦች ክልል መንግስት ውስጥ ከሚገኙ ስድስት ዞኖች አንዱ ነው። ዞኑ 10 ወረዳዎችና አራት የከተማ አስተዳደሮችን በውስጡ ያቀፈ ነው።

በዞኑ ውስጥ ለህዝብ ተጠቃሚነት መረጋገጥ የሚሰሩ ብዙ መንግስታዊና መንግስታዊ ያልሆኑ ድርጅቶች ይገኛሉ። ከነዚህም አንዱ የሆነው በህዝቡ ጉልበት፣ ዕውቀትና ገንዘብ ተቋቁሞ በመንግሥት መሸፈን ያልተቻሉ የልማት ክፍተቶችን ለመሸፈን እየሰራ ያለውን የዳውሮ ልማት ማህበር (ዳልማ) በዛሬው ዝግጅታችን ለመቃኘት እንሞክራለን።
የዳውሮ ልማት ማህበር (ዳልማ) ከኢትዮጵያ ሲቪል ማህበረሰብ ድርጀቶች ባለስልጣን ፍቃድ የተሰጠውና ከ1993 ዓ/ም ጀምሮ በስራ ላይ የሚገኝ አንጋፋ ሀገር በቀል የልማት ድርጅት ነው።
ማህበሩ የዞኑ ህዝብ ያለበትን ማህበራዊ እና ኢኮኖሚያዊ ችግሮችን በማጥናትና በመለየት ማህበራዊና ኢኮኖሚያዊ አገልግሎት ሰጪ ተቋማትንና መሠረተ ልማት አውታሮችን በተጠናከረ መልኩ ለመዘርጋት ህብረተሰቡን፣ አባላትንና በአከባቢው የሚገኘውን ሀብት በማስተባበር በልማት ስራ ላይ በማዋል የህብረተሰቡን የኑሮ ደረጃ ለማሻሻል የሚሰራ ተቋም ነው።
የማህበሩ አባላት፣ ደጋፊዎች፣ አጋር ድርጅቶች እና ሌሎች ባለድርሻ አካላትን በማስተባበር በሚገኘው ሀብት መንግስት መድረስ የማይችልባቸው የበጎና የተለያዩ የማህበረሰብ ልማት ስራዎችን እያከናወነ እንደሚገኝ የማህበሩ ስራ አስኪያጅ አቶ ሙሉጌታ በዛብህ ገልጸዋል።
ዳልማ ግዙፍ የልማት ስራዎችን ማከናወን የቻለ ትልቅ የህዝብ ባለውለታ ድርጅት መሆኑን ያወሱት የማህበሩ ዋና ስራ አስኪያጅ ተጠናቅቆ ለህዝብ አገልግሎት በመስጠት ላይ ካሉ ጥቅቱን በአኃዝ ለመግለጽ ያህል፦
በትምህርት ዘርፍ 64 ትምህርት ቤቶች ግንባታ፣ የአቅም ግንባታ ስራ፣ እንዲሁም ግብዓት የማሟላት ስራ መሠራቱን፤ በጤና ልማት ሥራዎች 22 የጤና ኬላ ግንባታና ማስፋፊያ፣ የታርጫ ጠቅላላ ሆስፒታል የእናቶችና ህፃናት ህክምና ክፍል እንዲሁም ግብዓት የማሟላት ስራ መሠራቱን በንጹሕ መጠጥ ውሀ አቅርቦት 74 ቦኖዎች፣ በግብርናና አከባቢ ጥበቃ ዘርፍ 16 የእንስሳት ጤና ክሊኒክ ግንባታ የተሰሩ መሠረተ ልማቶችን በእንክብካቤ ለመጠቀም ግንዛቤ የማስጨበጥ የአቅም ግንባታ ስራዎች መሠራቱን ስራ አስኪያጁ ገልጸዋል።
የማህበራዊ ኃላፊነትን ከመወጣት አንፃር ለተለያዩ ግለሰቦች፣ ቡድኖችና ግለሰቦች ድጋፍ ማድረጉን የጠቀሱት ሥራ አስኪያጁ በአጠቃላይ ከ400 ሚለየን ብር በላይ ወጪ የተለያዩ አገልግሎት ሰጪ ተቋማት መገንባቱን እና ሰፊ የዞኑን የማህበረሰብ ክፍል ተጠቃሚ ማድረግ መቻሉን አክለዋል።
ይሁን እንጂ ልማት ማህበሩ በፊት ባለው አቅም ልክ እንዳይንቀሳቀስ ማነቆዎች መኖራቸውንም አልሸሸጉም።
የሀብት እጥረት መኖሩ፣ ከአባላት የተሰበሰበው ሀብት በጊዜ ያለመተላለፍ፣የተቋማዊ ማኔጅመንት ክፍተት፣ በሀገርቱና በዓለም ደረጃ የተከሰተው ጦርነት ምክንያት ረጂ ደርጅት መቀነስ/ውስንነት እና የተከናወኑ ተግባራትን ለአባላቱ ግልጽ ያለማድረግና የሚዲያ አጠቃቀም ችግሮች እንደሆኑ ኃላፊው ጠቅሰዋል።
ከላይ የተዘረዘሩትን ማነቆዎችን በመፍታት ዘርፈ ብዙ የሆነውን የማህበረሰብ ልማት ለማረጋገጥ ማህበሩ ከዞኑ መንግስት እና ከሌሎች ባለድርሻ አካላት ጋር በመቀናጀት ቀላል የማይባሉ እርምጃዎችን እየወሰደ እንደሚገኝ ስራ አስኪያጁ አንስተዋል።
ከዞኑ መንግስት አካላትና ህዝብ ተወካዮች ጋር በመሆን በቀጣይ ለሚሰሩ የልማት ስራዎች የዳውሮ ልማት ፕሮጀክት ጽ/ቤትን በማቋቋም ከአጠቃላይ አባላት ከየማህበራዊ መሠረት ከ500 ሚለዮን .ብር በላይ ለማሰባሰብ በንቅናቄው ግብ ጥሎ በማስተባበር ላይ ይገኛል።
በበዞኑ ውስጥ፣ ከዞኑ ወጪ በአዲስ አበባ፣ በሀዋሳ፣ በቴፒና ሌሎች ከተሞች ነባር አባላትን የማነቃቃትና አድስ አባላትን የማፍራት ስራ በሰፊው እየተሰራ ይገኛል ብለዋል።
በባህል፣ ታርክና ቋንቋ ልማትና ቅርስ ጥበቃ ስራ ላይ በ98 ሚለየን ብር በ5025 ካ.ሜ ቦታ ላይ ክልሉን የሚመጥን ትልቅ የባህል አዳራሽ ግንባታ እየተካሄደ ሲሆን የፕሮጀክቱ አፈጻጸም 23% እና ስትራክቸር ስራው 71% ደርሷል ነው የተባለው።
አንድ የማህበረሰብ ት/ቤት “ሂዶታ” በመከፈቱ ባለፉት ሦስት ዓመታት የ12ኛ ክፍል ከተፈተኑት በ2014 ዓ/ም 100%፣ በ2015 ዓ/ም 95% እና በ2016 ዓ/ም 100% ተፈታኞች ውጤት በማምጣት ወደ ዩንቨረሲቲ መግባት መቻሉንና 33 ተማሪዎች በአሁኑ ሰዓት በዳልማ ወጪ በት/ቤቱ እየተማሩ መሆኑን ገልጸዋል።
በ2016 ዓ/ም በማረቃ ወረዳ በሞዴል ሙሉ አንደኛ ደረጃ ትምህርት ቤት ከጃፓን ኢምባሲ ጋር በመተባበር 1 ብሎክ ባለ 4 የመማሪያ ክፍል እና ሽንት ቤት ተገንብቶ በመጠናቀቅ ላይ መሆኑን ጨምረው አብራርተዋል ።
በማሪ ማንሳ ወረዳ ከ2014 ዓ/ም ጀምሮ ከግልመር ኦፍ ሆፍ ከሚባል ግብረ ሰናይ ድርጀት ጋር በመሆን በስድስት ት/ቤቶች በ21 ሚለየን ብር ወጪ ለተለያዩ አግልግሎት የሚውል ህንፃና ግብዓትን የማሟላት ተግባር መከናወኑን አብራርተዋል።
Ripple effect ከሚባል ግብረ ሰናይ ድርጅት ጋር በመሆን በሁለት ወረዳዎች በአከባቢ ጥበቃና በዝቅተኛ ኑሮ ደረጃ የሚገኙ 1870 የማህበረሰብ ክፍሎችን በድለባ በቁጠባና በጠባብ ማሳ ላይ ምርታማነትን ከመጨመር አንፃር በማደራጀት ተጠቃሚ ማድረግ ተችሏል ነው ያሉት።
ከስራ ዕድል ፈጠራ አንጻር በማዕድን ልማት ስራ የድንጋይ ከሰል ለማምረት ቦታውን በመረከብ የምርት ፍቃድ ተወስዶ ወደ ማምረት ለመሸጋገር ዝግጅት ላይ መሆኑን አንስተዋል።
ከስራ ዕድል ፈጠራ በተጨማሪ ገቢን ለማመንጨት ብሎም በከተማው ቱርዝምን ለማነቃቃት እንግዳ ማረፊያ የሚሆን 12 ክፍል ሎጅ ተገንብቶ በመጠናቀቅ ላይ ይገኛል።
በመጨረሻም ልማት ማህበሩ ከገባበት ችግር ውስጥ በመውጣት እንደገና እንድንሰራራ ያገዘውን የክልልና የዞኑ መንግስት እንዲሁም ሌሎች ባለድርሻ አካላትን አቶ ሙሉጌታ አመስግነዋል።
ልማት ማህበሩ በህዝብ ለህዝብ የተቋቋመ በመንግሥት መሸፈን የማይቻሉ የህዝብን የመልማት ፍላጎትን በመለየት የተለያዩ የባለድርሻ አካላት ጉልበት፣ ዕውቀትና ገንዘብን በማስተባበር የሚሰራ መንግስታዊ ያልሆነ ድርጅት በመሆኑ የሁሉንም ቅንጅትና ደጋፊን ይሻል የዝግጅት ክፍሉ መልዕክት ነው።
በጌታሁን ግርማ