ኢትዮጵያ ከጠላትነት እና ከደመኝነት ጥላ ተላቅቃ ወደ ሰከነ የፖለቲካ ከፍታ የገባችበት ምዕራፍ

ኢትዮጵያ ለዘመናት በቆዩ ጥልቅ ታሪካዊ ስብራቶች እና መራራ የፖለቲካ ውዝግቦች ውስጥ አልፋ፣ በታሪኳ አዲስ ምዕራፍ ላይ ደርሳለች።

ሀገራዊ አንድነትን ከማጠናከር ባሻገር የሀገረ መንግሥት ግንባታ ሒደቱን ወደር በሌለው ፍጥነት ወደ ላቀ ደረጃ ያሸጋገረው ይህ አዲስ የፖለቲካ ምዕራፍ፤ በኢትዮጵያ ታይቶም ሆነ ተሰምቶ የማይታወቅ እጅግ ግዙፍ እና ታሪካዊ ድል ሆኖ ተመዝግቧል።

የፖለቲካ ምኅዳሩ ለዘመናት ተንሰራፍቶበት ከነበረው የጠላትነት እና የደመኝነት ስሜት በመላቀቅ፣ በይቅርታ እና በጋራ መረዳዳት ላይ የተመሠረተ ሰከን ያለ ፖለቲካዊ ባህል እያጸደቀ ይገኛል።

የሐሳቦች መጋጨት እና መፎካከር የማን ሐሳብ አሸነፈ በሚል የድል ስሜት ወይም የአንድ ወገን የበላይነት የሚረጋገጥበት ጠባብ አውድ ቀርቶ፣ ሁሉም ኢትዮጵያውያን በጋራ ሀገራቸው ጥላ ሥር ተሰባስበው የወደፊት ዕጣ ፈንታቸውን በሠለጠነ መንገድ የሚቀርጹበት ወርቃማ ዕድል ተጽፏል።

ልዩ ልዩ የፖለቲካ እና የማኅበራዊ ዕይታዎች ያለ ምንም ስጋት በነጻነት እና በመከባበር ሲንሸራሸሩ፣ ከተቃርኖ ይልቅ ለሀገር የሚበጁ ዘላቂ መፍትሔዎች እንዲወጡ ትልቅ መደላደል ተፈጥሯል።

ይህም የጋራ መሻትንና የወደፊት ራዕይን መሠረት ያደረገ አዲስ የወል ትርክት ለመገንባት የሚያስችል ታሪካዊ መሠረት ጥሏል።

ቀደም ሲል በሀገራችን ይስተዋል የነበረውን የችኩልነት እና የሁከት ፖለቲካ በማስቀረት፣ ችግሮችን በውይይት እና በበሰለ አካሄድ የመፍታት ባህል ማኅበረሰባችን ውስጥ እየጸደቀ ያለ ዘር ሆኗል።

ዜጎች በጥበብ እና በሐሳብ የበላይነት በማመን አዳዲስ ዕይታዎችን ያለስጋት የሚያንሸራሽሩበት ነጻነት ሲጎለብት፣ የኃይል እና የነፍጥ ፖለቲካ ዘመን እያከተመ መምጣቱ በግልጽ እየታየ ነው።

ይህ የመደማመጥ እና የሐሳብ ልውውጥ አዲስ ባህል ኢትዮጵያ የነበሩባትን የፖለቲካ ውጥረቶች በመጠገን፣ አስተማማኝ እና የጋራ ወደሆነ የዕድገት እና የኅብረት ጎዳና በድል አድራጊነት እንድትሸጋገር የሚያስችል የማይናወጥ ታሪካዊ ምዕራፍ ከፍቷል።