በጥንት ዘመን፣ አንድ ስመ-ጥሩ አንጥረኛ ይኖር ነበር። ይህ አንጥረኛ ለሀገሩ ጋሻ እና ጦር በመቅረጽ ይታወቃል።
አንድ ቀን ጠላት በሀገሪቱ የሚሰነዝረው ጥቃት ሁሌ ስለሚከሽፍበት የሀገሪቱ ጥንካሬ ከአንጥረኛው አሠራር ጭምር ነው ብሎ አሰበና “ጋሻውን መስበር ካልቻልን፣ ጋሻውን የያዘውን እጅ እንቁረጥ፤ ጦሩን መመከት ካቃተን፣ ጦሩን የሚወረውረውን ትከሻ እርስ በእርሱ እናጋጭ” የሚል የውስጥ በትር ሰነዘረ።
አንጥረኛው ይህንን ሰማና የሀገሩን ወጣቶች ሰበሰበ። አንድ አንድ ቀጭን እንጨት ሰጣቸውና “ስበሩት” አላቸው። ሁሉም በቅጽበት ሰበሩት። በመቀጠልም በርካታ እንጨቶችን በአንድ ላይ አጠንክሮ በቆዳ ጠፍር አሰረና “አሁን ደግሞ ሞክሩት” አላቸው። ጉልበተኛ የተባሉት እንኳ ቢታገሉ ሊሰብሩት አልቻሉም።
አንጥረኛው እንዲህ አላቸው፦ “ልጆቼ! ጠላት በመጀመሪያ የሚመጣው እንደ እንጨቶቹ ነጥሎ ሊሰብራችሁ ነው። እናንተ እንደ ተነጠለ እንጨት ከሆናችሁ ጠላት ሳይለፋ ያሸንፋችኋል። ነገር ግን እንደነዚህ የታሰሩ እንጨቶች በዓላማ እና በራዕይ ከተሰናሰላችሁ (ከተደመራችሁ)፣ ጠላት እናንተን ለመስበር ሲሞክር የገዛ እጁ ይሰበራል። የእኛ ጥንካሬ ያለው በነጠላ ጉልበታችን ሳይሆን በመተሣሠራችን ውስጥ ነው።”
ይህ ተረት በኢትዮጵያ የፖለቲካ አውድ ውስጥ ትልቅ ትርጉም አለው።
ከ2010 መጋቢት እስከ 2018 መጋቢት ድረስ ያለፍንባቸው ስምንት ዓመታት፣ በትክክልም የተበታተኑ እንጨቶችን አክሞ በማሰርና “በመደመር” እሳቤ የማይበገር ብሔራዊ ኃይል የፈጠርንባቸው ዓመታት ናቸው።
መጋቢት ለኢትዮጵያውያን ብዙ ትርጉም ያለው ወር ነው፤ የዓድዋ ድል የታወጀበት፣ የለውጥ ፀሐይ የወጣችበት እና ብሔራዊ ኩራታችን ከፍ ያለበት የታሪክ ማኅደር ነው። ዛሬም ከመጋቢት 2010 እስከ መጋቢት 2018 ድረስ ባለው የለውጥ ጉዞ ውስጥ፣ እንደ ሀገር የቆምነው በመካከላችን ያለውን የአንድነት ማሰሪያ አጥብቀን በመያዛችን ነው።
ታሪክ እንደሚያስተምረን ሀገራችንን ለማዳከም የሚሹ ኃይሎች በቀጥታ ከመጋፈጥ ይልቅ፣ እርስ በእርስ እንድንጋጭ፣ በሕዝብ እና በመንግሥት መካከል ያለውን እምነት እና መተማመን ለማላላት፣ እንዲሁም ሀገራዊ የጥንካሬ መገለጫዎቻችንን በሐሰት ትርክቶች ለማጠልሸት ጥረት ሊያደርጉ እንደሚችሉ መገንዘብ ይገባል። የእነዚህ ኃይሎች ዋነኛ ግቡ እንደ ሀገር ነጣጥሎ መበተን ነው።
ነገር ግን እኛ የጠቢቡን አባት ትምህርት አንረሳም! እንደተሰበሰቡት እንጨቶች ሁሉ፣ እኛም በአንድነት ስንታሰር ኃይላችን ይበልጣል። የጥፋት ወሬ እርስ በእርሳችን እንዲነጣጥለን አንፈቅድም።
ስለሆነም፡-
- አንድነትን ማጥበቅ፦ በሕዝብ እና በመንግሥት መካከል ያለውን መተማመን ከምንጊዜውም በላይ ማጠናከር። እርስ በእርስ መጠራጠር የውድቀት መጀመሪያ መሆኑን ተረድተን ለጋራ ዓላማ መቆም፤
- በብልሃት ማየት፦ ማንኛውንም ሕዝቡ በአንድነት እንዳይቆም የሚነዙ አጀንዳዎችን በጋራ መከላከል፤
- በልማት አጀንዳ ላይ መሆን፦ በጥፋት ወሬ ተጠምደን ጊዜ ከማጥፋት ይልቅ፣ ትኩረታችንን በታላላቅ ሀገራዊ የልማት ስኬቶቻችን እና በብሔራዊ ጥቅማችን ላይ ማድረግ ይጠበቅብናል።
ከመጋቢት እስከ መጋቢት የመጣንበት ስምንት ዓመታት የጽናት እና የብርሃን ዓመታት ናቸው። ማንኛውም ስውር ደባ አንድነታችንን ሊበጥሰው አይችልም። እኛ የታሰሩ እንጨቶች ነን፤ ልባችን አንድ፣ ራዕያችን አንድ፣ ኢትዮጵያችንም አንድ ጠንካራ ሀገር ናት!
#EBC
